الشخصيات : القاضى - المتهم خليفة - الحاجب
( تفتح الستار على القاضى وجلسة محكمة )
القاضى : نادى يابنى على القضية الاولى
الحاجب : القضية الاولى ( يدخل المتهم خليفة ويقف أمام القاضى )
القاضى : اسمك ايه يابنى
المتهم : اسمى ..!! ( ويضرب بكفه على رأسه ) إسمى .....!!
القاضى : مش فاكر اسمك واللا ايه ؟؟؟؟؟؟؟
المتهم : أيوه يابيه هاقول أهوه ..... إسمى خليفة يابيه أيوه خليفة خلف خلف الله
القاضى : سنك كام ياخليفة .......؟؟؟؟؟؟؟؟
خليفة : مش عارف والله يابيه ..بس هما قالولى انى أنا اتولدت ساعة ماحفروا القناة
القاضى : إيه ياخليفة انت هاتكدب دول حفروا القناة من أيام الخديوى اسماعيل
خليفة : لآ يابيه انت فاكر القناة اللى بيقولوا عليها قناة السويس لآ دى القناة اللى قدام بيتنا .
القاضى : خلصنى ياخليفة وقولى ايه تهمتك ....؟؟؟؟؟؟
المتهم : مش عارف والله يابيه هما اللى جابونى هنا .
القاضى : ( ينظر فى ملف ) : فى ملف القضية بيقولوا ان انت بنيت بيت بدون تصريح .
المتهم : أصل العيال كتير وهما وأمهم مش عارفين يناموا أعمل إيه يابيه ...؟؟
القاضى : انت عارف ياخليفة اللى يبنى بيت فى أرض زراعية بدون تصريح بيجراله إيه...؟؟
خليفة : إيه يابيه ؟؟؟؟
القاضى : حبس خمس سنين ياخليفة
(يخرج خليفة يتمتم بالكلام مع الحاجب ويغلق المسرح ثم يفتح مرة أخرى )
القاضى : نادى يابنى على القضية الاولى .
الحاجب : القضية الاولى ( يدخل خليفة )
القاضى : إيه ياخليفة ايه اللى جابك تانى ...؟؟
خليفة : مش عارف والله يابيه .
القاضى : ياخليفة بنيت البيت وقلنا عشان العيال وامهم يعرفوا يناموا تقوم تفتح شباك فى البيت ياخليفة
خليفة : الله ... امال البيت يتهوا ازاى يابيه ...؟؟
القاضى : ياخليفة انت عارف اللى يفتح شباك فى بيت كان مبنى على أرض زراعية بدون تصريح يجراله ايه ...؟؟
خليفة : لآ يابيه
القاضى : حبس عشر سنين
( يخرج خليفة يبكى ويتمتم بالكلام ويغلق المسرح ثم يفتح مرة أخرى )
القاضى : نادى يابنى على القضية الاولى .
الحاجب : القضية الاولى ( يدخل خليفة )
القاضى : ( بحدة وعصبية ) ايه اللى جابك تانى ياخليفة ....؟؟؟
المتهم : مش عارف والله يابيه
القاضى : كل حاجة مش عارف مش عارف ... ايه ده ياخليفة بنيت البيت وقلنا ماشى فتحت الشباك وقلنا ماشى ... لكن بتقفله ليه ياخليفة ...؟؟؟
المتهم : مش انتوا اللى قولتوا يابيه
القاضى : انت عارف ياخليفة اللى يقفل شباك كان مفتوح فى بيت مبنى على أرض زراعية بدون تصريح يجراله ايه ...؟؟؟
خليفة : إيه يابيه .
القاضى : حبس 15 سنة ياخليفة
( يخرج خليفة بجلبة وبكاء وصراخ ثم يغلق المسرح ثم يفتح )
القاضى : نادى يابنى على القضية الاولى
الحاجب : القضية الاولى ...( يدخل خليفة )
القاضى : ايه تانى ياخليفة ...؟؟؟؟؟؟؟؟
خليفة : وانا مالى يابيه كل شويه يجيبونى هنا مش عارف ليه ....؟؟؟؟؟؟؟
القاضى : مش عارف .... انت بنيت البيت وقلنا ماشى وفتحت شباك وقلنا ماشى وقفلت الشباك وقلنا ماشى .... لكن تهد البيت
المتهم : مش انتو اللى قولتوا يابيه ...؟؟؟؟؟؟
القاضى : انت عارف اللى يهد بيت كان مبنى على أرض زراعية ومفتوح فيه شباك بدون تصريح يجرالوا ايه .........؟؟؟؟؟؟؟
خليفة : لآ يابيه
القاضى : حبس 20 سنة ياخليفة
( يسقط خليفة ملقى على الارض ويقوم القاضى وينحنى عليه )
القاضى: أنت مت واللا ايه ياخليفة انت عارف ان اللى يموت فى المحكمة بدون تصريح يجرالوا ايه ياخليفة .....؟؟؟؟؟؟_________________
